ایران نے امریکی اڈوں پر کون سے میزائل داغے ہیں؟

امریکی اہلکار کا کہنا ہے کہ ایران نے امریکی فضائی اڈے پر مختصر اور درمیانے فاصلے تک مار کرنے والے بیلسٹک میزائلوں سے حملہ کیا۔

سی این این کے مطابق ایک امریکی دفاعی اہلکار نے پیر کو بتایا کہ قطر میں العدید ایئر بیس پر "ایران سے آنے والے مختصر فاصلے اور درمیانے فاصلے تک مار کرنے والے بیلسٹک میزائلوں سے حملہ کیا گیا۔”

اہلکار نے کہا کہ اس وقت، امریکی ہلاکتوں کی کوئی اطلاع نہیں ہے ہم اس صورتحال کو قریب سے مانیٹر کر رہے ہیں اور جیسے ہی یہ دستیاب ہو جائے گا مزید معلومات فراہم کریں گے۔”

نیویارک ٹائمز نے دعویٰ کیا ہے کہ منصوبوں سے واقف تین ایرانی اہلکاروں نے کہا کہ ایران نے قطری حکام کو پیشگی اطلاع دی تھی کہ حملے ہو رہے ہیں تاکہ ہلاکتوں کو کم کیا جا سکے۔

عہدیداروں نے کہا کہ ایران کو علامتی طور پر امریکا پر جوابی حملہ کرنے کی ضرورت تھی لیکن ساتھ ہی اسے اس طریقے سے انجام دیا جس سے تمام فریقوں کو باہر نکلنے کا راستہ مل سکے۔

امریکی میڈیا فاکس نیوز کا کہنا ہے کہ امریکی طیاروں کو قطر کے اڈے سے پہلےہی ہٹا دیا گیا تھا۔

قطری وزیر دفاع کا کہنا ہے کہ فضائی دفاع نے امریکی فوجی اڈے پر میزائل حملے کو روک دیا ہے، ایرانی اقدامات سے خطے میں سلامتی اور استحکام کو نقصان پہنچے گا۔

قطری وزارت خارجہ کا کہنا ہے کہ ایرانی پاسداران انقلاب کی العدید ایئربیس پر حملے کی مذمت کرتے ہیں، حملہ قطر کی خود مختاری اور فضائی حدود کی کھلی خلاف ورزی ہے،۔

ایران کے پاسداران انقلاب نے قطر میں امریکی فوجی اڈے پر حملے کی تصدیق کردی ہے۔